ตสฺมา น มุตฺโต ปาเปหิ กมฺเมหีติ ฯ อุปมํ กโรหีติ ฯ ยถา มหาราช โกจิเทว
ปุริโส อญฺญตรสฺส ปุริสสฺส อมฺพํ อวหเรยฺย กึ โส ทณฺฑปฺปตฺโต ภเวยฺยาติ ฯ อาม
ภนฺเต ทณฺฑปฺปตฺโต ภเวยฺยาติ ฯ น โข โส มหาราช ตานิ อมฺพานิ เถเนติ ยานิ
เตน โรปิตานิ กสฺมา ทณฺฑปฺปตฺโต ภเวยฺยาติ ฯ ตานิ ภนฺเต อมฺพํ นิสฺสาย
ชาตานิ ตสฺมา ทณฺฑปฺปตฺโตต ภเวยฺยาติ ฯ เอวเมว โข มหาราช อิมินา นามรูเปน
กมฺมํ กโรติ โสภณํ วา ปาปกํ วา เตน กมฺเมน อญฺญํ นามรูปํ ปฏิสนฺธิยติ ตสฺมา
น มุตฺโต ปาเปหิ กมฺเมหีติ ฯ กลฺโลสิ ภนฺเต นาคเสนาติ ฯ

อิมมฺหา กายา อญฺญํ กายํ สงฺกมนปญฺโห สตฺตโม ฯ

ราชา อาห ภนฺเต นาคเสน อิมินา นามรูเปน กมฺมํ กตํ กุสฺลํ วา อกุสลํ
วา กุหึ ตานิ กมฺมานิ ติฏฺฐนฺตีติ ฯ เถโร อาห อนุพนฺเธยฺยุํ โข มหาราช ฉายาว
อนุปายินีติ ฯ สกฺกา ปน ภนฺเต นาคเสน ตานิ กมฺมานิ นิทสฺสิตุํ อิธ วา อิธ
วา ตานิ กมฺมานิ ติฏฺฐนฺตีติ ฯ น สกฺกา มหาราช ตานิ กมฺมานิ นิทสฺทสิตุํ
อิธ วา อิธ วา ตานิ กมฺมานิ ติฏฺฐนฺตีติ ฯ อุปมํ ภนฺเต กโรหีติ ฯ ตํ กึ
มญฺญสิ มหาราช ยานีมานิ รุกฺขานิ อนิพตฺตผลานิ ตานิ ผลานิ สกฺกา นิทสฺสิตุํ อิธ
วา อิธ วา ตานิ ผลานิ ติฏฺฐนฺตีติ ฯ น หิ ภนฺเตติ ฯ เอวเมว โข มหาราช
อพฺโพฉินฺนาย สนฺตติยา น สกฺกา ตานิ กมฺมานิ นิทสฺสิตุํ อิธ วา อิธ วา ตานิ
กมฺมานิ ตฏฺฐนฺตีติ ฯ กลฺโลสิ ภนฺเต นาคเสนาติ ฯ

กมฺมผลอตฺถิภาวปญฺโห อฏฺฐโม ฯ

ราชา อาห ภนฺเต นาคเสน โย สตฺโต อุปฺปชฺชติ ชานาติ โส
อุปฺปชฺชิสฺสามีติ ฯ เถโร อาห อาม มหาราช โย อุปฺปชฺชติ ชานาติ โส
อุปฺปชฺชิสฺสามีติ ฯ อุปมํ ภนฺเต กโรหีติ ฯ ยถา มหาราช กสโก คหปติโก วีชานิ
ปฐวิยํ ปติฏฺฐเปตฺวา สมฺมา เทเว วสฺสนฺเต ชานาติ ธญฺญา นิพฺพตฺติสฺสนฺตีติ ฯ
อาม ภนฺเต โส ชาเนยฺยาติ ฯ เอวเมว โข มหาราช โย อุปฺปชฺชติ ชานาติ โส
อุปฺปชฺชิสฺสามีติ ฯ กลฺโลสิ ภนฺเต นาคเสนาติ ฯ

อุปฺปชฺชนชานนปญฺโห นวโม ฯ